ما هو مش معقول نجرى ورا امال متدمرة مسبقا واوهام صنعها خيالنا ولا قلب بيعانى من صرخات ولا واقع انت رافضه ايا كان الواقع ده ايه ....المفروض انى اكمل واقبل الضغوط والمفروض برده انى اقول انا كويس مش عارف هل الحياه دلوقتى عكس سير خطانا ولا احنا اللى ماشيين بالعكس ولا يمكن مش ده الطريق اساسا اسئلة كتيرة بتدخل جوانا بتجرحنا ... بعدنا عن ناس علاقة الحب اقل شىء بيربطنا بيهم ... عارفين احيانا صرخاتنا مش بيسمعها غيرنا او يمكن دايما بس هنعمل ايه ما انت لازم تتحمل صرخاتك وتتعذب بصداها جواك ... تعرفوا انا اعرف واحد باع الدنيا باللى فيها فى سبيل انه يكون مرتاح البال وفقير جدا بس الابتسامه دايما مش بتفارق عيونه قبل شفايفه ... دايما لما بشوفه بسال نفسى هل لازم انى ابيع شىء عشان اشترى مكان شىء ويمكن اللى هشتريه ده لا يقدر بتمن ... مش عارف .... اسئله كتيرة اوى وحوارات وهواجس شاب مجنون بيكتب ومش عارف اخرتها ايه وقلمى هيودينى فين .... بس انا حسيت انى عايز اكتب قلت اكتب وماله ما دى الحاجه الوحيدة اللى بعملها وانا مرتاح على الاقل ..ورقى بيسمعنى يمكن مش بيجاوبنى بس بيسمعنى باهتمام غير ناس تانيه عندها قلب واحساس او تقريبا لغيوا موضوع الاحساس ده ...انا سمعت كده مش هتفرق اكتب ياد اكتب هو حد هيقولك انت كاتب كده ليه ؟؟؟يا جماعه انا اول مرة اكتب بالعاميه بس تعرفوا شعور جديد اوى انك تكلم بنى ادم جواك وانت مش عارفه بس هو عارفك لانه ياما اتعذب من صرخاتك وياما حاول يكلمك بس انت كنت بعيد اوى وهو كمان صوته كان واطى من جروحه ومش قادر يوصلك عموما انا بقوله انا اهو اصرخ فيا قولى اعمل ايه ....بالله عليك تقولى اعمل ايه بجد تعبت .....؟؟؟؟؟ تعبت يا ابن ادم ؟؟؟؟
No comments:
Post a Comment